تاریخ اشاعت:۔26-02-2009

حماس کے بانی شریک کا بیٹا اسرائیلی جاسوس نکلا, رپورٹ

مصعب حسن نے مبینہ طور پر درجنوں حملے ناکام بنانے میں مدد کی

یوسف نے دس برس قبل عیسائی مذہب اختیار کر لیا تھا اور وہ ان دنوں کیلفورنیا میں رہائش پذیر ہے
اسرائیل سے عبرانی زبان میں شائع ہونے والے ایک سرکردہ اخبار نے اپنی ایک حالیہ رپورٹ میں انکشاف کیا ہے کہ اسلامی تحریک مزاحمت ۔ حماس کے بانی شریک رہ نما شیخ حسن یوسف کا بیٹا اسرائیل کے لئے جاسوسی کرتا رہا ہے۔

روزنامہ "ہارٹز" کے مطابق بتیس سالہ حسن یوسف کی پیشگی مخبری کی وجہ سے اسرائیلی اہداف کے خلاف حماس کی بہت سی عسکری کارروائیاں ناکام ہوئیں۔

حماس اور خود مصعب یوسف کے والد نے اس بات کو مسترد کیا ہے کہ مصعب کو تنظیم کی کسی عسکری یا حساس نوعیت کی کارروائی کا قطعی کوئی علم نہیں تھا۔ اخبار کا کہنا ہے کہ مصعب یوسف کو اسرائیل کے داخلی محکمہ سراغرسانی "شین بیت" میں کوڈ نام "گرین پرنس" کے نام سے جانا جاتا تھا۔

"حماس کا بیٹا" کے عنوان سے تالیف کردہ کتاب کے اقتباسات پر اپنی خبر میں اسرائیلی اخبار نے دعوی کیا ہے کہ مصعب یوسف نے دس برس قبل عیسائی مذہب اختیار کر لیا تھا اور وہ ان دنوں کیلفورنیا ۔ امریکا میں رہائش پذیر ہیں۔ مصعب یوسف "حماس کا بیٹا" کے شریک مصنف ہیں۔ یہ کتاب آئندہ ہفتے امریکا میں شائع ہو گی۔

کتاب میں کئے جانے والے انکشافات اگر درست ہیں تو یہ حماس کے لئے انتہائی نقصان دہ ثابت ہو سکتے ہیں۔ اس کے بعد دبئی میں حماس کے عسکری ونگ اہم رہ نما محمود المبحوح کے قتل میں خود تنظیم کی صفوں میں کسی کے رکن کے ملوث ہونے سے متعلق الزامات کو تقویت ملتی ہے۔ اس قتل کو بارے میں بڑے پیمانے پر اسرائیلی جاسوسی ادارے "موساد" کی کارروائی قرار دیا جا رہا ہے تاہم موساد کے ملوث ہونے کے بارے میں ابتک کوئی قابل اعتبار شہادت منظر عام پر نہیں آ سکی۔