Telephone:- 1-514-970-3200

Email:-urdupower@ymail.com
 

امریکہ کا خلائی ادارہ ناسا پہلی بار سورج کا قریب سے مشاہدہ کرنے کے لیے ایک خلائی گاڑی اس کی بیرونی فضا میں بھیجنے کا منصوبہ بنا رہا ہے۔

ناسا کا کہنا ہے کہ اس سے پہلے کوئی بھی سورج کے اس قدر قریب نہیں گیا ہو گا۔

اس مقصد کے لیے بغیر انسان کےگاڑی کے حجم کے برابر ایک خلائی جہاز جس کا نام سولر پروب پلس رکھا گیا ہے سال دو ہزار اٹھارہ سے پہلے سورج کی جانب روانہ کر دیا جائے گا۔

اس منصوبے پر ایک کروڑ اسی لاکھ ڈالر لاگت آئے گی۔

واشنگٹن میں واقع ناسا کے ہیڈاکوٹر میں سولر پروب پلس پر کام کرنے والے سائنسدان لیکا گوہاتھاکرتا کا کہنا ہے کہ ’ پہلی بار ہم اس قابل ہو نگے کہ سورج کو سونگھ سکیں اور اس کا ذائقہ محسوس کر سکیں۔‘


خلائی گاڑی سورج کے چودہ سو ڈگری درجہ حرارت سے تباہ ہونے سے پہلے معلومات زمین پر بھیج دے گی:ناسا
ایک دوسرے سائنسدان ڈیک فشر کا کہنا ہے کہ ’خلائی گاڑی کی مدد سے سولر فزکس کے دو بنیادی سوالات کو حل کرنے کی کوشش کریں گے، ایک سورج کی بیرونی سطح نظر آنے والی سطح سے بہت زیادہ گرم کیوں ہے،دوسرا شمسی ہوا جو زمین اور شمسی نظام پر اثر انداز ہوتی ہے آگے کیسے بڑھتی ہے۔‘

اس خلائی گاڑی پر نصب آلات کو سورج کے درجہ حرارت اور تابکاری اثرات سے محفوظ رکھنے کے لیے ایک کاربن سے تیار کردہ ہیٹ شیلڈ استعمال کی جائے گی۔

اس کے علاوہ شمسی ہوا کے ذرات کا پتہ چلانے والے آلات، ایک تھری ڈی کیمرہ اور مقناطیسی فیلڈ کی پیمائش کرنے کے آلات نصب ہونگے۔

محققین کا کہنا ہے کہ سورج ایک اسی جگہ ہے جہاں ابھی تک کوئی خلائی گاڑی نہیں بھیجی گئی ہے۔

برطانیہ کی ردرفرڈ ایپلیٹن تجربہ گاہ کے سائنسدان رچرڈ ہیریسن نے بی بی سی کو بتایا کہ’ سورج کس طرح زمین پر کس طرح اثر انداز ہوتا ہے، آج کل یہ ایک بڑی بات ہے۔‘

انھوں نے بتایا کہ ’ ایک چیز جو ہم نے نہیں کی ہے وہ سورج پر نہ جانا، آپ سوچتے ہیں کہ ایک خلائی جہاز، مریخ اور وینس کی جانب پرواز کر رہا ہے لیکن سورج اس سے قدرے مختلف بات ہے‘۔